المفتاح النحاس

كل حاجة.. البيت.. المكتب.. الأرض.. وحساب في البنك فيه حوالي 8 مليون جنيه.. بس لازم نتصرف بذكاء
قلت لها عايزة ايه؟
قالت أولا.. هنروح البنك نفتح الخزنة.. ثانيا.. هنعمل محضر إثبات حالة انهم طردوكي ورموا تراب أمك.. ثالثا.. هنرجع بيتك
قلت أرجع ازاي؟ دول مغيرين الكالون
ضحكت لأول مرة
قالت يا بنتي انتي صاحبة البيت.. ومعاك عقد ملكية.. نقدر نجيب البوليس ونفتح البيت بالقانون
روحنا البنك
الخزنة رقم 7 فتحت بالمفتاح النحاس
جواها كان فيه 3 حاجات
ساعة أبويا اللي كنت عايزة آخدها
وبرطمان صغير جديد لأمي.. أبويا كان شاريه وكاتب عليه لأغلى واحدة
وعقد جواز أمي وأبويا القديم.. وصورة ليهم يوم فرحهم
وصورة ليا وأنا صغيرة وأنا راكبة على كتف جدي
قعدت أعيط
المحامية سابتني أعيط براحتي
بعدها روحنا القسم
عملت محضر
الظابط لما شاف العقد اتصدم
قال يعني انتي صاحبة البيت وطردوكي؟
قلت ورموا تراب أمي في الشارع
الظابط قال تعالي معايا
خدنا بوكس وروحنا على البيت
أول ما وصلنا لقيناهم قاعدين في الصالة بيتفرجوا على التليفزيون كأنهم أصحاب البيت
مرات أبويا أول ما شافت البوليس وشها قلب أبيض
قالت في ايه؟
الظابط قال الآنسة دي معاها عقد ملكية البيت.. انتو قاعدين هنا بصفتكم ايه؟
أخوها قام وقف
قال ده بيت أختي.. جوزها كان ساكن هنا
المحامية طلعت العقد
قالت جوزها كان موظف عند بنتها.. ودي صاحبة البيت من 4 سنين.. ومعايا توكيل من جدها.. ومعايا وصية.. ومعايا كشف حساب بالفلوس اللي اتسرقت
ابنها كان بيصور كالعادة.. بس المرة دي إيده كانت بتترعش
قلت له صور.. صور كويس.. عشان الفيديو ده هيفيدك في المحكمة
مرات أبويا قالت انتي كدابة.. انتي مزورة الورق
المحامية قالت طب نطلع على الشهر العقاري دلوقتي ونشوف مزور ولا لا؟
سكتت
الظابط قال قدامكم ساعة تلموا حاجتكم وتخرجوا.. وإلا هعمل لكم محضر تعدي على أملاك الغير
ساعة واحدة
نفس الجملة اللي هي قالتهالي امبارح قدامك عشر دقايق وتمشي
قعدت على الكرسي اللي أبويا كان بيحب يقعد عليه
وتفرجت عليهم وهما بيلموا هدومهم في شنط زبالة سودا
ابنها وهو نازل قال لي على فكرة أمك كانت ست غلبانة
قلت له أمي كانت أغلى من البيت اللي انتو كنتو هتموتوا عليه
بعد ما مشيوا.. دخلت أوضة أبويا
لقيت الفولدر الأزرق التاني.. اللي هي كانت بتقول مفيش فولدر
فتحته.. لقيت جواب بخط إيد أبويا
لبنتي حبيبتي
لو بتقري الجواب ده يبقى أنا مش موجود
أنا آسف اني سيبتك مع ناس زي دي.. أنا كنت فاكر اني بحميكي لما أسكت.. بس طلعت بظلمك
البيت بيتك.. والفلوس فلوسك.. وجدك كان عنده حق لما قال لي خلي بالك من القرايب
المفتاح اللي معاكي بيفتح الخزنة.. وفيه حاجة صغيرة ليكي ولأمك
أنا عمري ما بطلت أحب أمك.. حتى واحنا منفصلين.. وهي كانت صاحبتى لحد آخر يوم
خلي بالك من نفسك.. ومتسمحيش لحد يقول لك انتي يتيمة.. انتي عندك عيلة كبيرة.. أنا وأمك وجدك.. وكلنا بنحبك
أبوكي
حضنت الجواب
ورحت جبت البرطمان الجديد وحطيت فيه باقي تراب أمي اللي كنت لميته من الأرض
وحطيته جنب ساعة أبويا
والمفتاح النحاس علقته في رقبتي
مش عشان بيفتح خزنة
عشان بيفكرني ان جدي كان عارف ان في يوم هييجي ناس هتحاول تسرق كل حاجة وتقول لي انتي ولا حاجة
بس هو كان سايب لي المفتاح اللي يرجع لي كل حاجة
تاني يوم الصبح بدري
روحت المقابر
حطيت ورد على قبر أبويا وأمي
وقلت لهم رجعت البيت.. متقلقوش.. محدش هيرمي تراب حد فينا تاني
وأنا راجعة لقيت جارتي القديمة بتقولي سمعنا انك رجعتي بيتك يا حبيبتي.. الحمد لله
قلت لها آه رجعت.. ده بيت أبويا وأمي وأنا بنتهم.. ومحدش هيعرف يطردني منه تاني
ودخلت البيت.. قفلت الباب بالمفتاح الجديد.. وشغلت نور الأباجورة اللي كان لسه مفتوح من يوم ما طردوني
ولأول مرة من يوم ما أبويا وأمي ماتوا.. نمت من غير ما أعيط.
بعد ما رجعت البيت ونمت أول ليلة من غير عياط.. صحيت على صوت خبط جامد على الباب
الساعة 6 الصبح
بصيت من العين السحرية لقيت ابن مرات أبويا واقف ومعاه اتنين شكلهم غريب.. واحد منهم ماسك شومة
فتحت الشباك اللي فوق وقلت عايز ايه؟
قال افتحي الباب.. احنا نسينا حاجات جوه
قلت حاجاتكم خدتوها في شنط الزبالة امبارح.. مفيش حاجة ليكم هنا
قال لا في.. في دهب أمي في أوضتها.. 3 غوايش و 2 خاتم
ضحكت
دهبها؟ ده الدهب اللي أبويا كان جايبهولها من فلوسي أصلا
قلت معاك فاتورة انه دهبك؟
سكت
قال بقول لك افتحي بدل ما أكسر الباب
قلت جرب تكسره.. أنا مركبة كاميرات جديدة امبارح.. والفيديو هيروح للبوليس في ثانية.. وانت عندك محضر تعدي أصلا
اللي معاه شده ومشيوا
قفلت الشباك ونزلت كلمت المحامية
قلت لها هما جم تاني
قالت متوقع.. دول مش هيسيبوا 8 مليون جنيه وبيت وعمارة بسهولة.. بصي.. لازم نأمن نفسنا كويس.. أنا هبعت لك حد يركب كالون جديد مصفح.. وهقدم بلاغ في النيابة بالسرقة اللي كانت بتحصل
قلت والقتل؟
سكتت شوية
قالت بصي.. أنا مش عايزة أوعدك بحاجة.. بس البوليس لقى حاجة امبارح بعد ما انتي مشيتي.. لقى بصمات أخو مرات أبوكي على باب المكتب اللي اتقفل من جوه يوم الحادثة.. وهو كان بيقول انه مكنش هناك
قلبي وقع
يعني بجد هما اللي عملوها؟
قالت تعالي المكتب الساعة 10.. في حاجة لازم تشوفيها
روحت المكتب
لقيتها مشغلة فيديو على اللاب توب
فيديو من كاميرا محل قصاد مكتب أبويا
المحل كان مركب كاميرا بتصور الشارع
في الفيديو.. باين أبويا وأمي داخلين المكتب الساعة 6 ونص المغرب.. بيضحكوا.. أمى شايلة كيس فيه عيش..