أم بالإيجار

يروح الشغل ومرات ابني تقولي يا ماما وتعملي القهوة وتقعد تحكي معايا، والعيال بقوا ييجوا يقعدوا جنبي ويحكولي عن المدرسة
بس أنا كنت مستنية، كنت عارفة ان الدلع ده مش هيطول كتير، أصل الطبع بيغلب التطبع، وكنت مستنية أشوف هيصبروا قد ايه
وفعلا بعد 10 أيام بالظبط كل حاجة رجعت زي الأول بس بالتصوير البطيء
ابني رجع يرمي الشراب في نص الصالة، مرات ابني رجعت تقولي ممكن تعمليلنا كذا بصيغة الأمر مش الطلب، والعيال رجعوا يسيبوا أطباقهم مكانها
ساعتها فهمت ان اللي اتكسر مرة ممكن يتلحم بس هيفضل معلم
فقلت لا، أنا مش هرجع أبقى الخدامة تاني، أنا المرة دي هبقى ذكية
قمت الصبح بدري زي عادتي بس معملتش فطار، عملت فطار لنفسي بس، قهوة وبيضة وتوست وقعدت أكل لوحدي في البلكونة
العيال صحيوا قالولي تيتا فين الفطار
قلتلهم المطبخ عندكوا، التلاجة مليانة، اللي عايز يفطر يقوم يعمل
مرات ابني بصتلي مصدومة قالت ايه ده
قلتلها ده الشرط التالت، اللي يوسخ حاجة ينضفها واللي ياكل يشيل طبقه، أنا هساعد بمزاجي مش بالأمر، أنا النهاردة مزاجي أعمل لنفسي بس
سكتت ومقالتش حاجة بس وشها بان عليه الضيق
تاني يوم ابني قالي ماما القميص الأبيض بتاعي فين
قلتله في الغسالة، بقاله 3 أيام، انت ماطلعتوش منها، أنا مش مسئولة عن هدوم حد
قال بس انتي كنتي بتعملي كده على طول
قلتله كنت، وبطلت، انت راجل كبير وعندك ايدين، قوم اغسل قميصك
ابتدت المشاكل تكبر تاني، بس المرة دي أنا مكنتش بعيط ولا بزعل، كنت باردة، بعمل اللي عليا لنفسي وبس
أختي كلمتني قالتلي برافو، خليكي كده، لازم يتعلموا
بعدها باسبوعين حصلت حاجة كبيرة
مرات ابني جالها ترقية تانية، ترقية أكبر، وبقت مديرة قسم، وقررت تعمل حفلة كبيرة في البيت، عزمت مديرينها وزمايلها في الشغل، حوالي 15 واحد
وجت قالتلي بكل ثقة بصي بقى احنا عاملين حفلة يوم الجمعة، عايزاكي تعمليلنا أكل يكفي 20 واحد وتنضفي البيت كله قبلها
بصيتلها وضحكت
قلتلها لا
قالت نعم
قلتلها لا مش هعمل، البيت ده بيتك انتي وانتو اللي عازمين ضيوفكوا، انتو اللي تنضفوا وتطبخوا، أنا ضيفة زيي زيهم، لو عايزة مساعدة اطلبي بأدب وأنا لو فاضية هساعد
وشها جاب ألوان، قالت انتي بتحرجيني قدام جوزي
قلتلها أنا اللي اتحرجت لما سيبتوني لوحدي وروحتوا مطعم فاخر وقلتولي سخني البواقي
ابني تدخل وقال لمراته هي عندها حق، احنا اللي عازمين احنا اللي نشيل
يوم الحفلة أنا لبست أحلى لبس عندي ونزلت قعدت مع الضيوف كأني واحدة منهم، ومرات ابني هي اللي كانت بتجري في المطبخ هي وابني بيقدموا الأكل
واحدة من مديراتها سألتني حضرتك مين
قلتلها أنا أم صاحب البيت، ست البيت الأصلية
الست ضحكت وقالت باين عليكي البركة كلها
بعد الحفلة مرات ابني دخلت أوضتي وقالتلي شكرا
استغربت، قلتلها على ايه
قالت شكرا انك مسبتينيش أبقى قليلة الزوق قدام مديريني، لو كنتي عملتي كل حاجة زي زمان كانوا هيفتكروا اني مشغلة حماتي خدامة، بس لما شافوكي قاعدة معززة مكرمة احترموني أكتر
ساعتها أول مرة أحس انها فهمت بجد
ومن ساعتها اتفقنا اتفاق جديد
بقينا نقسم الشغل، أنا بعمل الغدا يومين في الأسبوع بمزاجي وهي بتعمل 3 أيام وابني يومين بيطلب دليفري، والمواعين كل واحد بيشيل طبقه، والغسيل كل واحد مسئول عن أوضته
والأهم من ده كله بقينا نتكلم، بقينا نقعد بالليل نحكي، حكيتلها عن جوزي لما مات وحكيتلها عن تربيتي لابني لوحدي، وهي حكتلي عن ضغط الشغل وعن خوفها انها تفشل كأم وكمديرة
اكتشفت انها مش شريرة، هي بس كانت مضغوطة وبتطلع ضغطها عليا عشان أنا الوحيدة اللي ساكتة
بعدها بشهر ابني جابلي هدية، جابلي تذكرة سفر لأختي وقاللي روحي اقعدي معاها أسبوع زي ما اتفقنا، البيت هيفضل نضيف والله
سافرت وقعدت أسبوع رجعت لقيت البيت فعلا نضيف، مش زي نضافتي بس نضيف، والأهم انهم استحملوا غيابي من غير ما يشتكوا
دلوقتي بقالي 6 شهور على النظام الجديد
أنا بصحى براحتي، بعمل قهوة وأقعد في البلكونة، بقرا قرآن، بتفرج على التليفزيون، بعمل أكل لما يكون مزاجي حلو، ولو مش حلو بقولهم اطلبوا أكل من بره
حفيدي بقى بيجي يقولي تيتا ممكن تعلميني أعمل ساندوتش زي بتاعك
بعلمه، عشان يتعلم يعتمد على نفسه مش عشان أخدمه
وابني بقى كل يوم وهو نازل يبوس راسي ويقولي متزعليش مني يا أمي
وأنا بقوله أنا مش زعلانة، أنا بس اتعلمت أحب نفسي
الورقة اللي كنت معلقاها على الباب يوم ما مشيت لسه محتفظة بيها في دولابي، كل ما أحس اني هرجع ضعيفة تاني بطلعها وأقراها
مكتوب فيها البيت ده بيتي
أيوه البيت ده بيتي، بس مش بالعقد ولا بالورق، بيتي عشان أنا اللي اديته روح، وأنا اللي أقدر أخد روحه معايا لما أمشي
وعشان كده لو انتي حماة وقاعدة في بيت ابنك وحاسة انك بقيتي شفافة وملهاش لازمة قومي
قومي وسيبي المواعين في الحوض وسيبي الغسيل في الغسالة وسيبي البيت يضرب يقلب
يومين بس
هتعرفي قيمتك
وهيعرفوا ان الست اللي كانت بتقولولها سخني البواقي دي هي اللي كانت مخلية البيت بيت أصلا