فرحي انا وبنتي

الفستان اللي انتي اختارتيني بيه
الكلمة دي خلتني أعيط طول الليل.
تاني يوم الصبح، صحيت لقيت تليفوني بيرن 27 مكالمة فائتة، منه هو، ومن مامته، ومن أخته، ورسايل واتساب طويلة عريضة.
مامته كاتبة انتي فضحتينا قدام الناس، ابني ملوش ذنب، هو كان عايز الفرح يبقى شكله حلو، وانتي اللي كبرتي الموضوع، بنتك مكانها مع الأطفال فعلا، ايه اللي يخلي طفلة تطلع مع عروسة؟
أخته كاتبة على فكرة أخويا كان مستحمل انك مطلقة وعندك بنت، وده كتير على فكرة، وكان المفروض تقدري ده، مش تسيبيه واقف زي الأهبل في القاعة
وهو بعتلي فويس نوت 3 دقايق بيقول انتي مچنونة؟ انتي ډمرتي فرحنا عشان بنتك قلعت فستان؟ انتي عارفة أبويا دفع كام في القاعة؟ انتي عارفة الناس هتقول علينا ايه دلوقتي؟ كل ده عشان عيلة صغيرة زعلت؟ كنت قلتيلها كلمتين وخلاص، لازم تعملي دراما وتسيبي العريس في الكوشة؟
مسمعتش ولا فويس للآخر، عملت بلوك لكل الأرقام.
بس بعدها بساعتين، لقيت الباب بيخبط، فتحت لقيت أخته جاية ومعاها علبة.
قالتلي أخويا بعتلك باقي حاجتك اللي كانت في شقته، وبيقولك ابعتي الدهب
قلتلها دهب ايه؟
قالت الشبكة اللي جابهالك
قلتلها الشبكة في أوضتي جوه، ثانية أجيبها
دخلت جبتها ورميتها في العلبة، قلت لها خديه ومش عايزة أشوف وشكم تاني، وقولي لأخوكي لو كان شايف ان بنتي عيب عشان من جوازة قديمة، فهو اللي عيب انه راجل يروح يلعب بدماغ طفلة 11 سنة ويقولها متقوليش لماما
البنت اتخرست ومشيت.
بعدها بكام يوم، كنت قاعدة مع بنتي بنعمل الواجب، لقيتها بتقولي ماما هو أنا السبب ان فرحك باظ؟
قلتلها لا يا حبيبتي، انتي السبب ان فرحي بقى أحلى فرح في الدنيا
قالت ازاي؟
قلت عشان لولا انك قلتيلي هو قالك ايه، كنت هتجوز واحد هيخليكي طول عمرك تحسي انك ضيفة في بيتنا، واحد هيقولك اقعدي على جنب، متتكلميش، استخبي، أنا كنت هعيش مع واحد بيكسف منك، وانتي كنتي هتكبري وانتي فاكرة انك عيب، فانتي أنقذتيني
حضنتني وقالت أنا بحب الفستان اللافندر أوي
قلتلها وأنا بحب اللي لابسة الفستان اللافندر أوي
ومن ساعتها بقيت كل ما حد يتقدملي ويجي البيت، أول حاجة بعملها بدخل بنتي تقعد معانا، وأقول للراجل بص، أنا معايا بنت، بنتي دي هي الراجل بتاع البيت، لو هتحبني لازم تحبها هي الأول، ولو هتتجوزني يبقى هتتجوزنا احنا الاتنين سوا، لو مش موافق الباب أهه
ناس كتير مشيت، وناس قالت ايه الدراما دي بس أنا مكنش فارق معايا.
لحد من 4 شهور، اتعرفت على واحد في شغلي، كان مطلق هو كمان وعنده ولد عنده 9 سنين.
أول مرة جه البيت، جاب معاه فستانين، واحد لبنتي وواحد لابني اللي هو ابنه، وقال لبنتي سمعت انك بتحبي اللون اللافندر، فجبتلك واحد شبهه بس أحلى، عشان تلبسيه لما نخرج احنا الأربعة سوا
بنتي بصتلي وابتسمت، أول مرة من يوم الفرح البايظ أشوفها مبتسمة لحد غريب كده.
بعدها باسبوع، كنا خارجين احنا الأربعة، ابنه مسك إيد بنتي وقال لها تحبي نبدل؟ أنا أبقى أخوكي وانتي تبقي أختي؟
بنتي ضحكت وقالت موافقة
ساعتها عرفت ان العيلة الجديدة مش لازم تيجي بفستان أبيض وقاعة وزفة، العيلة الجديدة بتيجي لما حد يقول لبنتك انتي تستاهلي تبقي واقفة جنب مامتك في أول الصف، مش قاعدة مع الأطفال ورا
والفستان الأبيض اللي لبسته يومها؟ بعته، وجبت بفلوسه تذكرة سفر أنا وبنتي لدهب، قعدنا أسبوع هناك، هي لابسة الفستان اللافندر وأنا لابسة فستان أبيض خفيف، واتصورنا على البحر وكتبت
على الصورة فرحنا الحقيقي
وأي حد بيسألني اتجوزتي؟ بقول آه، اتجوزت بنتي، ومن يومها وأنا أسعد واحدة في الدنيا