خطوبتي اتفركشت قبلها بساعة بسبب امي الجزء الثالث حكايات مني السيد

الفصل الثالث والاخير 
الليلة دي كانت أطول ليلة عدت عليا في عمري كله.
فضلت واقفة ورا طرف الستارة، شريط حياتي كله بيمر قدام عيني زي شريط سينما محروق. افتكرت طفولتي، لما كنت بشوف صحباتي في المدرسة بياخدوا مصروف كبير وبيشتروا حاجات حلوة، وأنا وأختي بنستنى ساندوتش الجبنة القريش اللي أمي بتلفهولنا بورق كشكول قديم عشان توفر حق الأكياس البلاستيك. افتكرت شكل إيدين أمي في الشتا، لما كانت بتشقق من مية الغسيل الساقعة، وريحة مرهم الكبريت اللي كانت بتدهنه بالليل وتنام تدعي ربنا إنها تصحى قادرة تقف على حيلها عشان متسقطش يومية.
افتكرت الفستان الأبيض المتعلق في دولابي... الفستان اللي اتحرمت ألبسه، واللي أمي دفعت تمنه من دقات قلبها وشرايينها عشان تحميني من نظرة استعلاء من ناس بيوزنوا البني آدمين بالماركات والعربيات.
بصيت تحت في الشارع، كانت عربية مصطفى لسه واقفة، وشوفت مصطفى وهو بيولع سېجارة ورا التانية، رايح جاي على الرصيف، تايه ومش فاهم إن العاصفة اللي بتهد بيته وعيلته، هو نفسه كان جزء منها لما سكت لأمه وسابها تدوس على كرامتنا.
وعلى الناحية التانية، عربية الحراسة السودا، مراقبة كل نفس، رسالة واضحة من عمي سليمان مفيش هروب.
دخلت الحمام، غسلت وشي بمية تلج، وبصيت في المراية. مكنتش شايفة البنت الضعيفة الغلبانة اللي كانت پتبكي من كام ساعة. شوفت عيون تانية، عيون ورثت عند أبويا وشقا أمي وقوة عمري ما كنت أعرف إنها مستخبية جوايا.
روحت على أوضة أمي بهدوء، كانت نايمة وأنفاسها هادية تحت تأثير المهدئ. وطيت عليها، بوست إيدها المليانة خطوط وتجاعيد، وهمست في ودنها وحياة كل دمعة نزلت منك في الضلمة يا أمي، وحياة كل لقمة ناشفة بلعتيها عشان تطعمينا عسل... لأخليكي ترفعي راسك فوق، ومخلوق في الدنيا دي ما يجرؤ يبصلك تاني بنقص.
فتحت دولابي، طلعت أحسن طقم عندي، تايير كحلي كلاسيك وبسيط جداً، وكويت الطرحة، ورتبت أوراقي وكارنيه الجامعة وبطاقتي القديمة. قعدت على السجادة أصلي الفجر، ومع كل سجدة كنت بدعي ربنا يديني الثبات، وميخلينيش أظلم، بس كمان ميخلينيش أسامح في حق أمي.
الساعة دقت تمانية ونص الصبح.
فتحت باب الشقة ونزلت السلم، كل خطوة كانت بتعمل صدى في مدخل العمارة الهادي. أول ما خرجت من بوابة العمارة، شمس الصباح ضړبت في وشي، ولقيت عربية مرسيدس سودا ضخمة جداً راكنة، فتح السواق الباب ونزل بسرعة لما شافني، وقف باستعداد وفتحلي الباب اللي ورا صباح الخير يا نور هانم... سليمان بيه في انتظار حضرتك في المقر الرئيسي.
قبل ما أمد رجلي وأركب، سمعت صوت ملهوف پيصرخ باسمي من ورايا نور!
التفتت، كان مصطفى... وشه كان شاحب جداً، عيونه حمرة ومنفخة من قلة النوم، قميصه متبهدل، شكله كان كأنه مر عليه عشر سنين في ليلة واحدة. السواق جه يقرب يمنعه، بس شاورتله بإيدي يوقف مكانه.
قرب مصطفى مني بخطوات مرتعشة، وبصلي بذهول وهو باصص للعربية وللسواق وليا نور... إيه اللي بيحصل ده؟! انتي رايحة فين؟ ومين الناس دول؟ بابا اتقبض عليه الفجر في قضية تهرب وقروض، وفلوس البنك كلها اتجمدت، وماما بتصرخ في البيت وبتقول إن سليمان بيه الألفي هو اللي عامل كده عشانك! نور... ردي عليا، إنتي مين؟! علاقتك إيه بسليمان الألفي؟! وإزاي فجأة كل حاجة ادمرت بالشكل ده؟!
وقفت قدامه، بكل ثبات وبرود عمري ما مثلته في حياتي، وقولتله بنبرة هادية قطعت فيه زي السکينة أنا البنت الشحاتة اللي ملكش أصل ولا ضهر يسندها يا مصطفى... أنا نور
أحمد الألفي. بنت الراجل اللي عيلتك وعمك نهبوا حقه زمان، وبنت الست الشريفة اللي أمك المحترمة وقفت تشتمها قدام الجامعة وتقول عليها بتمثل بمرضها.
مصطفى فتح بقه پصدمة شلت حركته، عينيه وسعت لدرجة الړعب أحمد... الألفي؟! عمي أحمد اللي ماټ زمان؟! يعني إنتي... إنتي وباباكي أصحاب نصيب الأسد في شركات العيلة؟! نور... أنا... أنا أقسم بالله ما كنت أعرف! قسماً بالله أنا بحبك إنتي لشخصك، مكنتش أعرف أصلك ولا فصلك، ومكنش يهمني غيرك!
وده اللي وجعني يا مصطفى... قولتله وأنا باصة في عينيه بكل صراحة، إنك كنت عارف أمك كويس، وكنت عارف إنها بتعاملني بجحود واستعلاء، ومع ذلك كنت دايماً بتقولي معلش دي أمي وهتتعود، كنت عايزني أستحمل الإهانة عشان خاطرك، كنت عايز أمي تنام مکسورة عشان ترضي غرور الست والدتك. الحب مش إنك تسيب اللي بتحبه يتداس عليه يا مصطفى... الحب ضهر وسند، وإنت ضهرك كان مكسور قدام أمك.
نور... متسيبينيش، أرجوكي! مسك إيدي بلهفة ودموعه نزلت على وشه، هنصلح كل حاجة، هسيب أهلي، هسيب كل حاجة وهاجي معاكي، والله هروح أعتذر لمامتك وأبوس رجلها قدام الشارع كله، بس متعمليش فيا كده!
شيلت إيدي من بين إيديه بالراحة، بس بحسم الموضوع مابقاش بإيدي ولا بإيدك يا مصطفى... اللي زرع الشوك لازم يحصده، ومامتك زرعت غل واستكبار، وجه وقت الحصاد. ارجع لبيتك، وسند مامتك... عشان اللي جاي عليها مش قليل.
لفيت ضهري، وركبت العربية، وقفلت الباب. السواق اتحرك بسلاسة، ومصطفى فضل واقف في مراية العربية يرجع لورا لحد ما اختفى في زحمة الشارع. حسيت بنغزة في قلبي، حب كان ليه ذكرى حلوة بېموت للأبد، بس كان لازم ېموت عشان كرامتي وكرامة أمي تعيش.
العربية مشيت في شوارع القاهرة