هو بابا نسي اني ابنه

تسجيل
المرة الجاية هتبقى ورقة طلاق
بعد الخناقة اللي حصلت في البيت مراتي فضلت يومين مش بتكلمني
بتعمل الأكل لبنتها بس
بتغسل هدوم بنتها بس
وابني كأنه مش موجود في البيت
بيعدي من جنبها كأنه شفاف
وأنا كنت بعمل نفسي مش واخد بالي بس كنت واخد بالي من كل حاجة
كنت بشوفه وهو بيرجع من المدرسة يفتح التلاجة ميلاقيش اللانش بوكس بتاعه معمول زي بنتها
فبقيت أنا اللي أعملهوله الصبح قبل ما أنزل الشغل
بقيت أصحى الساعة 5 ونص أعمل لانش بوكس لابني فيه ساندوتشاته اللي بيحبها وتفاحة وعصير وورقة صغيرة كاتب فيها يا بطل أنا بحبك
وهو بقى كل يوم يرجع يقولي يا بابا قريت الورقة
مراتي شافت الورق ده مرة
قالت لي انت بتدلع الولد أوي
قلت لها آه بدلعه عشان اللي مبيتدلعش في بيته بيدور على الدلع بره
سكتت
بعدها بأسبوع المدرسة بعتتلي إيميل
قالولي احنا عملنا اجتماع وهنغير نظام الخروج بعد اللي حصل يوم الأربع
قالولي أي طفل هيتساب أكتر من نص ساعة هنكلم كل الأرقام اللي في القايمة وهنبعت عربية المدرسة توديه البيت وهنسجل الواقعة
قلت لهم تمام بس أنا عايز أسمع التسجيلات تاني لو ينفع
بعتولي التسجيلين تاني
سمعتهم وأنا قاعد في مكتبي في الشغل
سمعت صوت مراتي وهي بتقول خليه قاعد هناك مستني ومتكلمينيش تاني
الجملة دي فضلت ترن في وداني طول اليوم
روحَت البيت بالليل لقيت ابني قاعد بيعمل الواجب لوحده في أوضته وبنتها قاعدة في الصالة بتعمل الواجب ومراتي قاعدة جنبها بتساعدها
دخلت على ابني
قلت له محتاج مساعدة
قال لي لا يا بابا خلصت
قلت له طب تيجي نقعد في الصالة معاهم
قال لي لا أنا مرتاح هنا
فهمت
الواد بقى بېخاف يقعد معاها في نفس الأوضة
بېخاف لتسيبه تاني
حتى لو مش في المدرسة حتى لو في البيت
قعدت جنبه على الأرض
قلت له بقولك ايه فاكر شجرة التفاح المايلة اللي بره
قال آه
قلت له تيجي نعدلها سوا
قال إزاي
قلت له نجيب خشبة ونسندها ونربطها
قال بجد هنعرف
قلت له آه هنعرف
طلعنا الجنينة أنا وهو بالليل ومعانا كشاف
جبنا خشبة كبيرة وسندنا الشجرة وربطناها بحبل
وهو ماسك الحبل بيقولي يا بابا هي كده هتبقى معدولة
قلت له آه هتبقى معدولة بس هتفضل مايلة شوية عشان دي طبيعتها وطبيعتها حلوة
قال لي زيي يعني
قلت له زيك ازاي
قال يعني أنا طبيعتي إني بحب أعد الحاجات لما بخاف وده مش وحش
الكلمة دي خلتني أعيط تاني
حضنته وقلت له لا يا حبيبي مش وحش ده أحلى حاجة فيك
مراتي كانت واقفة في البلكونة بتبص علينا
ندهت وقالت انتو بتعملوا ايه في الضلمة
قلت لها بنعدل شجرة
قالت شجرة ايه دلوقتي ده وقت نوم
قلت لها الشجرة دي مهمة
قالت شجرة مايلة هتفضل مايلة
قلت لها لا هتتعدل لما حد يهتم بيها
دخلنا بعد ما خلصنا
تاني يوم حماتي جت
جابت معاها كيكة تفاح
قالت أنا عارفة إن النهاردة مش عيد ميلاد حد بس ابني كان نفسه فيها
ابني جري عليها وقال لها يا تيتا انتي عملتي كيكة التفاح
قالت آه يا حبيبي عشان انت بطل
قعدنا كلنا ناكل
مراتي مكلتش قالت عاملة دايت
بنتها أكلت حتة صغيرة
أما ابني أكل حتتين وقال لتيتا دي أحلى كيكة في الدنيا زي بتاعة ماما بالظبط
حماتي عيطت
وأنا عيطت
حتى بنتها الصغيرة عيطت من غير ما تفهم ليه
وبالليل بعد ما حماتي مشيت مراتي دخلت الأوضة وقالت لي
انت عايز ايه مني
قلت لها عايزك تحبي ابني زي ما بتحبي بنتك أو على الأقل متأذيهوش
قالت أنا مأذيتوش
قلت لها لأ أذيتيه لما سيبتيه ساعتين ونص بيعد خروم السقف وبيسأل هو بابا نسي إني ابنه
قالت طب أعمل ايه دلوقتي أروح أبوس رجله
قلت لها لا تروحي تبوسي دماغه وتقوليله أنا آسفة إني سيبتك وتقوليله إنك مش هتسيبيه تاني
قالت ولو مقلتش
قلت لها يبقى انتي اللي اخترتي
سكتت شوية وبعدين قالت حاضر هقوله
طلعت من الأوضة وراحت أوضة ابني
خبطت ودخلت
أنا وقفت ورا الباب أسمع
سمعتها بتقول له بص يا حبيبي أنا آسفة إني اتأخرت عليك يوم الأربع
ابني مردش
قالت له أنا كنت مشغولة واتلخبطت
ابني قال لها بس انتي شفتيني
قالت له شفتك
قال لها وشاورتلك
قالت له آه
قال لها ومشيتي
سكتت
وبعدين قالت له أنا آسفة
قال لها هتعملي كده تاني
قالت لا
قال لها بجد
قالت بجد
قال لها طب ممكن أطلب طلب
قالت اطلب
قال لها ممكن متخليش حد يقول عليا إن ماما ماټت فخلاص
قالت حاضر
قال لها وممكن تسيبي اللحاف بتاعي معايا محدش ياخده
قالت حاضر
قال لها شكرا
طلعت من الأوضة وعينيها حمرا
بصتلي وقالت كده كويس
قلت لها آه كويس
ومن ساعتها وهي بتحاول
بصراحة بتحاول
مش بتحبه زي بنتها لسه
بس بقت تاخده من المدرسة في معادها
بقت تعمل لانش بوكس ليه زي بنتها
بقت لما تعدي من قدام أوضته تقول له عامل ايه يا بطل
وهو بقى يرد عليها
بس لسه لما بېخاف بيعد
بيعد خروم السقف بيعد البلاط بيعد العربيات في الشارع
وأنا بقيت أعد معاه
أقوله بتعد ايه النهاردة
يقولي بعد النجوم يا بابا
أقوله وأنا بعد معاك
عشان يعرف إنه حتى لو اتساب مرة
عمره ما هيتساب تاني
وعشان يعرف إن اللي بيعد لوحده في أوضة فاضية ممكن في يوم يلاقي حد بيعد معاه